„Við verðum að tryggja það að fólk sem er með meðaltekjur og þar fyrir neðan að það lendi ekki í skerðingu, það fái fullar barnabætur," sagði Elín Björg Jónsdóttir, formaður BSRB í viðtali við Fréttastofu Rúv í gærkvöldi. Unnið er að nýrri skýrslu um stöðu heimilanna fyrir stjórnvöld og leggur BSRB mikla áherslu á að ráðist verði í úrbætur á barnabóta- og vaxtabótakerfunum.
„Mér var verulega brugðið ég átti von á því að þetta hefði tekist betur til og þannig hefur umræðan dálitið verið," sagði Elín Björg einnig um leið og hún benti á að barnabætur fylgi ekki verðlagi og því sé ekki sé nóg að hækka bæturnar. Þær séu tekjutengdar og viðmiðið það lágt að bætur foreldra á lágmarkslaunum skerðast.
„Við verðum að tryggja það að fólk sem er með meðaltekjur og þar fyrir neðan að það lendi ekki í skerðingu, það fái fullar barnabætur. Ef við ætlum að tryggja það að greiðslurnar nýtist sem allra best þá eigum við auðvitað að tryggja það að bæturnar fari til foreldra með meðaltekjur og þaðan af lægri."
Unnið er að nýrri skýrslu um stöðu heimilanna fyrir stjórnvöld og munu velferðarráðherra, fjármálaráðherra, innanríkisráðherra og efnahagsráðherra funda um hana í dag. Stefnt er að því að skýrslugerð ljúki síðar í vikunni og þá verði settar fram tillögur til úrbóta.
Í fréttum Rúv á fimmtudag var vitnað í útreikninga Hilmars Ögmundssonar, hagfræðings BSRB, en samkvæmt útreikningum hans hafa bætur einstæðs foreldris, sem er á lágmarkslaunum og á tvö börn, minnkað um tæpar 31 þúsund krónur frá árinu 2009 og bætur hjóna um rúmar 61 þúsund krónur. Miðað við uppsafnaða vísitölu neysluverðs í febrúar mánuði 2012 frá febrúar 2008 hefur kaupmáttur barnabóta rýrnað um rúm 26% hjá einstæða foreldrinu og rúm 33% hjá hjónunum.
Steingrímur J. Sigfússon, efnahags- og viðskiptaráðherra svaraði af því tilefni að það kæmi til greina að fara yfir þessi mál:
„Ég held að það komi mjög vel til greina að fara yfir barnabæturnar og vaxtabæturnar. Best væri ef við kæmumst alla leið og kæmum hér á húsnæðisbótum, einum samræmdum stuðningi við bæði leigjendur og þá sem eru að borga af húsnæði," segir Steingrímur. „Það er ráðherranefnd að störfum og við höfum bundið vonir við að ljúka þeirri vinnu bara fljótlega eftir páska. Þá verða verða teknar ákvarðanir um framhaldið."
Steingrímur segir að stjórnvöld séu að skoða stöðuna. „Það er bæði verið að horfa á stöðuna almennt og líka vanda afmarkaðra hópa sem hefur ekki tekist að leysa með fullnægjandi hætti fram að þessu eins og þeirra sem eru með lánsveð."
Fréttir Rúv af málinu má sjá í heild sinni hér að neðan:
http://www.ruv.is/frett/ekki-nog-ad-haekka-barnabaeturnar
http://www.ruv.is/frett/urbaetur-i-barna-og-vaxtabotum
Við minnum félagsmenn BSRB á að kjara- og viðhorfskönnunin sem Capacent Gallup er að framkvæma fyrir bandalagið er enn opin. Nú eru allra síðustu forvöð að svara könnuninni og BSRB hvetur alla félagsmenn eindregið til að taka þátt í könnuninni enda skapar könnunin mikilvægan grunn til samanburðar og rannsókna á launaþróun meðal félagsmanna BSRB. 